《2020車仔大事回顧》

2020年是不一樣的一年,車壇上又有什麼值得回憶的事情...
2020車仔大事回顧

還有不足24小時就踏入2021年,一場疫情打亂各大品牌的推車步伐,埋身肉搏的情況白熱化,就讓《手推車》跟大家盤點一下2020年的車(仔)壇大事。

2020車仔大事回顧

展覽重開無期

香港玩具節、ToySoul亞洲玩具展、冬季購物節相繼因疫情取消,2020年開得成的展覽只有年初貿發局玩具展、Pop Race Pop Up Store趕及第四波疫情前完成的Tarmac Works Minicar Fest,直接影響品牌賣車步伐。窮則變,變得通,Tiny微影然舉辦超級新貨周將展會版、限定版上網預訂,最新就連油麻地停車場都推埋出嚟;Minicar Fest則首次舉行預覽介紹一系列新車,相信會成為未來新常態;Pop Race年中及年尾分別開設Pop Up Store,第一場皇室堡活動由Toyeast舉辦,第二場旺角則由自己搞,並不定期出貨。由於第四波疫情仍未過去,2021年展覽活動不容樂觀。

Tiny微影氣勢如虹

無論你有幾唔鍾意方丈,但Tiny微影車仔疫市大賣卻是事實,今年夥拍80M印1:110巴士如同開動印鈔機,更出現罕見的「等開門」買車情況。品牌繼續與7-11合作推車,安排雖然未臻完善但卻成功打開新市場,Log-on等繼續賣特別版,年底與Shell推出的油站、油罐車吸引唔少車主晨早入油,呢個時勢算係咁。Tiny微影的專門店亦愈開愈多,屯門、觀塘都有分店,連同賣兒童玩具的B51,總有一間喺左近。

MINI GT佔鰲頭

憑藉高性價比見稱的MINI GT 2020年開始大爆發,一眾車款如平治190E、賓利Continental GT3、LBWK、林寶堅尼URUS系列等叫好叫座,成為1:64的新指標,同時對其他品牌造成壓力。這幾天MINI GT更連續發佈包括F1、萬事得MX-5、美國拖頭等新模具,2021年可以繼續期待,另外賣個廣告,下星期《手推車》又會訪問首腦Glen,有咩問題可以留言話俾我哋知。

Tarmac Works x ??

經過低調的Tarmac Works今年狀態明顯回勇,先唔講Minicar Fest的大獲好評,品牌巧妙地與不同品牌Crossover,如京商、Minichamps、Schuco甚至是MINI GT都有合作出車,當然順得哥情會唔會失嫂意就要等待時間驗證。今年周邊產品亦都唔少,如TWOC的碳纖會員卡、油罐造型包裝及徽章等,Marketing方面出色,造工亦有改善,但絕對有空間做得更好。

尷尬的Majorette

留言有人指Majorette「捉到鹿唔識脫角」,這點的確令人無奈,只因泰國廠房產能不足,每款車貨期以數月起跳,供應鏈問題導致大熱產品,如百佳 x Majorette別注車推出後,常品卻無法跟上,到常品抵港時熱潮已經冷卻。百佳車的受歡迎程度連廠方及百佳亦難以置信,基於產能原因,即時加碼變得不可能,到最新一期重出百佳車,基本上都易買得多,算是回應了市場要求。隨著亞洲區對Majorette的需求愈來愈大,新車相信會愈來愈難買,且看看代理及廠方有何解決方法。

京商、Hobby Japan相映成趣

京商年初推出盒裝書並用上新模具,當時予人眼前一亮的感覺,然而整體策略並無大改變:刷色。直至最近才有Lexus 570問世,能夠重拾昔日的餘暉留有疑問。由去年插QC插到今年的Hobby Japan質素終於有改善,不過價格始終較對手貴20%以上,儘管車款選擇得宜,但要擴大市佔率看來要想辦法做到「物有所值」。

動物王國Era Car

提起Era Car,相信大家可能先記起貓貓狗狗或是最新的鱷魚頭,Suzuki Every以及Jimny出完又出,幸好有不同配件令人唔覺悶;至於DC2則因黑眼圈被插到開花,GT-R明顯係迎合市場之作,總之有人買。老實講,出咩車款好似視乎老細鍾意咩車,2021年會出咩車都係睇心情。

Model 1踩入1:64市場

Model 1除了推1:76同1:120巴士外,今年更踩入1:64市場,推出豐田金豐市區、新界及大嶼山的士,內櫳車頂有浮雕紋理叫人驚喜,然而QC似乎唔多穩定,最初定價、現貨價問題亦提起一場小風波。希望官非過後Model 1能夠重新出發,推出更多1:64車仔。

傘兵Gaincorp Products

殺入1:64市場亦有Gaincorp Products,由Ford Transit、平治Vario改出平治Actros運輸車,但話峰一轉又轉出1:64 平治600 Pullman、Lexus LM350及五十菱N-Series平板拖車,質素唔錯,足與其他牌子拗手瓜。包裝盒終於由鐵罐,改成半透明紙盒,收藏更方便。

Tomica發力

2020年Tomytec好似訓醒咗終於發力,車款更貼地、場景Set繼續小試牛刀,香港Comfort的士較日本車型出得更早,「等埋Tomytec先」應該唔係口號。不過台灣有Tomica博,等萬信,都係算數吧。

反樸歸真BM Creations

由最初曬冷式出車到而家出一部Show一部,BM Creations策略明顯有別之前,100仔相信好多車迷都金晴火眼睇實,睇吓會唔會繼續曲高和寡,得自己識欣賞。但至少BM Creations話俾我哋知車仔都可以有唔同玩法,出年就睇市場受唔受落。

國企拓意

拓意出車繼續神經刀,一時出Audi RS6、福士Passat R36,一時就出紅旗閱兵車。今年除了有解放卡車外,剛剛更公佈東風-5B、東風-17、東風-26、東風-31、東風-41、巨浪2及長劍-100 1:100導彈發射車,震驚車壇。今年年中曾傳出Toyeast會代理拓意,最後似乎不了了之。

銷量跌 vs 新高價

受經濟下滑及同質化影響,2020年1:64銷情明顯下挫,壓貨壓力大增。不過,同一時間,Ignition Model繼續加價,樹脂車更索價600元以上,賣得比Make Up更貴,不過點貴都唔夠賣成千嘅MR Collection,相當呢幾個品牌嘅1:43而言係平,但會唔會變成小眾玩意呢?會唔會有更多牌子轉投1:64市場呢?相信2021年有答案。

小結

有人辭官歸故里,有人漏夜趕科場,2020年的車仔市場算得上是風起雲湧,強者愈強,其他的只有變陣見招拆招。The best/worst is yet to come,可以失望,但不能放棄希望。

Categories
20201:64BM CreationsDec 2020Hobby JapanIgnition ModelKyoshoLCD ModelMajoretteMINI GTModel 1POP RACETarmac WorksTiny微影TomicaTomytec拓意
Categories

RELATED BY

error: Content is protected !!