ORAAAAAAAAAA – ORA電車開Showroom

文：利思芸

圖：女小編MM

今朝去九展見人山人海，今次無Mirror有ORA。記得早幾個月介紹過英之傑代理長城汽車ORA電動車，到今日陳列室正式喺EMAX開幕，集團高層齊齊祝酒睇舞獅。

Showroom除咗有ORA Funky Cat外，仲有首次亮相的ORA Funky Cat 400 GT，尾翼大大隻GT一定唔怕認唔出，除咗得意外型外，粉藍色車身感覺亦較年輕，車櫳企理，隨時好過某啲電動車。不過，有圖有片都未必有真相，行入去睇過摸過feel過就更重要。

英之傑亞太區首席執行官Ruslan Kinebas期待未來與長城擴大合作，引進更多型號及新能源汽車；英之傑大中華區及新加坡首席行政總裁王玉平指ORA去年 在港收訂後，巿場反應熱烈，對電動車銷售感到樂觀；長城汽車東亞市場部高級經理張彬認為，ORA作為中國自主車企中首個獨立新能源汽車品牌，多款車型已經在德國、英國、愛爾蘭、瑞典、泰國、馬來西亞、澳洲等國家上市，似乎暗示未來更多電車抵港。

不過，我更加想知長城坦克會唔會有右軚呢？唔係要返內地試試喎。