極致奢華的流動藝術品 – Rolls-Royce Ghost Extended Series II 登陸香港

真正的奢華，從來唔只係一架車，而係一種生活態度。Rolls-Royce 昨日喺大嶼山遊艇會發表全新 Ghost Extended Series II，女小編有幸親身體驗。由踏上遊艇嗰刻開始，已經感受到品牌對優雅體驗的極致追求。今次特別安排遊艇接送，未見車，先感受到氣派！

今次亮相嘅加長版 Ghost Extended Series II，後座空間加長 170mm，車身採用 Twilight Purple 紫色，低調而貴氣，陽光下閃閃發光，非常吸睛！ 雖然外觀未有大變，但設計與科技都有升級，新車換上全新頭燈組，萬神殿鬼面罩變得更扁更闊，加上 LED 立體光條尾燈，型格又有氣勢。動力方面，搭載 6.75 公升 V12 雙渦輪增壓引擎，擁有 571 匹馬力、850Nm 扭力，配合 ZF 8 速自動變速箱、四輪驅動及四輪轉向，確保行車穩定。

小編印象最深嘅，絕對係超深嘅車尾箱，行家仲講笑可以收埋幾個人。當然，Rolls-Royce嘅奢華貼心細節亦俘虜咗小編嘅心，例如車門按鈕自動關閉，內藏於車門嘅雨傘設計，一按即抽，優雅又方便，完全就係一座 「移動的私人宮殿」！至於價錢，標準版 HK$7,880,000，而發佈會展出嘅加配版為HK$10,231,000。

發佈會奢華體驗滿分，正如 Ghost Extended Series II 本身極致豪華，無懈可擊。Rolls-Royce 更貼心準備紀念品，小編喜獲 tailor-made 名字草帽。 人生首次近距離感受 Rolls-Royce 嘅極致奢華，單單見到「歡慶女神」，已經忍唔住望多幾眼！