事隔一年 – LEGO Icons Land Rover Classic Defender 90

由於總編輯遲遲未有時間砌呢款LEGO Icons Land Rover Classic Defender 90，所以隔咗一年就交由小編KiWi同大家分享砌後感。

呢款Land Rover Classic Defender 90係為Land Rover愛好者同埋樂高汽車迷提供一個沉浸感嘅拼砌體驗，設計上忠於1983年嘅原版車款，有得運作嘅轉向系統、懸掛系統，仲有精細嘅內部細節。等小編分享完，大家再考慮下呢部過千嘅Land Rover究竟值唔值得入手。

Land Rover Classic Defender 90有15包零件同1包輪子配件。頭一包零件係拼V8引擎同唔同嘅工具同配件，有十字鎬、鏟子、斧頭、脫困板等。說明書都設計得好貼心，因為唔係人人都清楚啲工具點用，所以書入面有簡單介紹。砌嘅時候，V8引擎同油箱有啲位要細心調，特別係V8引擎上面嘅「小香腸」，要花啲技巧先至可以令8條零件對稱。工具箱嘅開關設計都好真實，放埋啲小工具落去會顯得更加完整。

第2至11包零件係拼車身，由底盤開始，到第三包先開始有綠色嘅車身零件，之後就按前坐、車頭、車門、後坐、車尾、車頂、輪呔再到引擎嘅順序去砌。砌車身嘅時候唔算難，只要跟住說明書就得。車頭同車尾有印有Land Rover嘅獨特零件；車裡面仲有預留嘅咖啡杯位，提醒駕駛者要保持精神。引擎有兩款選擇，V8同柴油，可以隨喜好選。但係砌前輪呔同軚盤嘅時候要留意，唔好砌得唔夠實，唔係軚盤就控制唔到前輪呔方向。

第12至15包零件係可替換嘅，因為呢款車有預設同探險兩種模式，可以換嘅零件比較多，探險模式更加型格同真實。小編覺得黑色車頂支架拼起上嚟比較麻煩，因為步驟多同埋工序重複。車頭配件有條繩子，要自己打結，考驗下細肌肉。車頂放咗配件之後，仲有兩條繩子固定，設計都幾貼心。

最後，小編用咗十個鐘頭先完成，成品長大約32厘米，寬同高度都有16厘米。小編鍾意樂高嗰種逐層逐層砌上去嘅感覺，但係如果用咗太多科技零件去固定，發現錯漏嘅時候拆開就麻煩。所以每次砌之前一定要確定好位置先放零件。建議先數齊需要嘅零件，再砌上去，咁就可以減少錯誤。（小編喺砌嘅過程中漏咗兩個細部件，好彩發現得早QAQ）

——————————–
專注模型車開箱、品牌專訪、真車資訊等最新消息
Like&Follow我哋最新動向
https://linktr.ee/hktoycar
關於任何類型合作、查詢，請電郵至: [email protected]
#手推車 #hktoycar #小編KiWi #LEGO #LandRover #ClassicDefender90