小鵬全新星艦 X9 抵港｜XP5 圖靈晶片 + 5C 超充 12 分鐘回血七成

小鵬（XPENG）七座旗艦 MPV 星艦 X9 自推出以來，一直係全球唯一配備主動式後輪轉向嘅超智能大型 MPV，喺國際市場有相當高嘅關注度。今次全新升級版 THE NEW X9 正式登陸香港，以四大核心技術進化、12 項全面升級嘅姿態亮相。標準前驅版車價$819,900起、長續航版$869,900起、高性能全輪驅動版多四萬。早鳥優惠減兩萬，另包電池終身保用及大灣區聯保。

XP5 圖靈晶片上身　智駕算力直接跳級

今次 THE NEW X9 最核心嘅升級，係換上小鵬自家研發嘅 XP5 圖靈晶片，算力達到 750 TOPS，直接令 XPILOT ASSIST Driving 智能駕駛輔助同智慧泊車系統嘅反應更快、判新更準。小鵬本身係全港首個配備遙控泊車功能嘅品牌，今次運算力提升之後，泊車速度同精準度都有明顯進步，對於揸七座大車喺香港窄位泊車嘅車主嚟講，呢個升級相當實際。

另一個值得留意嘅硬件升級係 21 吋超大 HUD 抬頭顯示器，將行車資訊、導航指示同智駕提示直接投射喺駕駛者視線範圍內，減少低頭睇錶板嘅需要。配合 XP5 晶片嘅即時運算，資訊顯示嘅流暢度同清晰度都有所提升，人車互動比上一代更加直覺。

800V + 5C 超充　10% 充到 80% 約 12 分鐘

續航焦慮一直係電動 MPV 用家最關心嘅問題，尤其係成家人出行、車載滿人嘅情況下。THE NEW X9 採用全域 800V 高壓平台配合 5C 超充技術，官方數據顯示由 10% 充電至 80% 僅需約 12 分鐘，呢個速度喺同級 MPV 入面相當有競爭力。

底盤方面，AI 底盤調節聯動空氣懸架與智慧 CDC，再加上液壓襯套同後輪轉向系統互相配合，可以精準抵銷路面顛簸。簡單講，就係想做到「揸大車但唔似揸大車」嘅駕駛感受，轉向靈活之餘又保持車廂穩定。

業界唯一三排電動三折疊座椅　4 至 7 座隨你變

MPV 最緊要係空間運用，THE NEW X9 嘅座艙配置幾有睇頭。佢採用業界唯一三排電動三折疊座椅設計，支援 4、5、6、7 座靈活切換，配合雲感零重力座椅，無論係載滿七人定係摺低後排做大型載物空間，都可以一鍵搞掂。

舒適配置方面，車廂內設有冷熱一體式電動開閉冰箱、環繞靜感柔風冷氣，加上全新導入嘅 RNC 座艙主動降噪技術（Road Noise Cancellation），系統會即時監測路噪並透過車內音響發放反向聲波抵銷，喺高速公路或粗糙路面行駛時都能保持車廂寧靜。前排亦新增雙側靜音電索門，開關門更安靜順暢，用嚟商務接送或者接放學都幾得體。

星艦設計語言　27 喇叭劇院級音響

外觀方面，THE NEW X9 以量子脈衝前燈同星軌一體尾燈前後呼應，配合星艦舷樑 A 柱、黑鏡純平側窗及 AGS 智慧可變進氣格柵等 20 項風阻優化設計，唔止好睇，仲實際提升續航效率。

車廂內部採用一體環抱分層設計，配置「星際光錐」IP 揚聲器同「水滴漣漪」門板揚聲器，27 個揚聲器帶來劇院級聽覺體驗。3.6 米環繞式氛圍燈覆蓋頂棚、門板與地板，支援 6 種主題切換，配合升級至 21.4 英寸嘅超大娛樂屏幕，基本上後排乘客可以當係一個流動影院。

安全方面都有明顯加強，新增爆胎穩行系統，即使高速行駛中爆胎都能穩定車身，安全氣袋數量亦增加至 9 個，主被動安全保障都比上代更全面。