中環新餐廳｜180° Modern Fire Grill——萬物皆可烤 Happy Friday走起

Happy Friday搵地方同朋友食飯，最緊要有氣氛，最好菜式份量夠大、可以一齊揀、一齊share。位於中環蘭桂坊的全新餐廳180° Modern Fire Grill可能係一個唔錯的選擇。

餐廳由聯合創辦人兼總廚 Chef Cédric Tsia 主理，菜單走隨性共享路線，以「萬物皆可烤」為信念，將明火烹調貫穿整個菜單，無論海鮮抑或肉類，火焰既係工具，亦係靈魂。餐廳設有開放式廚房，可以近距離睇住廚師烹調，氣氛十足。

來到餐廳一定要點招牌「煙燻脆皮雞」(港幣 $328/半隻），選用本地三黃雞，以車厘子木慢燻後再以備長炭翻烤，皮脆得輕輕一壓即裂，肉嫩而多汁，層次豐富，上枱一定即刻俾人清曬。

如想品嚐富香港地道風味的菜式，可以試試「烤本地鮮魷」(港幣 $208），鮮魷以明火炙燒至焦邊微捲，配上海膽忌廉醬與三文魚籽，彈牙多汁，味道層次出人意表。

「牛骨髓鑄鐵鍋飯」(港幣 $128）都係必點之選，靈感來自本地特色煲仔飯，以日本越光米加入牛肉油脂與牛骨上湯烹煮，鑄鐵鍋烤至飯焦再鋪上明火融化的牛骨髓，每粒米飯都吸飽牛肉精華，每一口都係濃厚而滿足的滋味。

Happy Friday點都要飲兩杯，餐廳雞尾酒單同樣延續「以火為本」理念，以濃烈煙燻風味為主軸設計。招牌作包括以味噌浸漬波本威士忌調製的Burnt Harvest、以烤墨西哥辣椒浸漬龍舌蘭調製的Red Ember，以及以梅斯卡爾酒與冷萃咖啡調配的Last Flame，與餐廳燒烤菜式完美相襯，為整個夜晚添上完美句號。