萬聖節玩具派對！黃埔天地 x TCM《Toys Assemble 玩具集結》10．23 開催

今個萬聖節唔止扮鬼扮馬——黃埔天地聯同《玩具收藏家販售展》（TCM），10 月 23 日起喺時尚坊 MTR 層搞《Toys Assemble 玩具集結》，三大活動一次過滿足你「睇、買、玩」嘅需求。

「變裝少女動漫稀有珍藏展」（10 月 23 至 30 日）搵嚟健力士世界紀錄保持者 Matthew（鄧明輝），從逾 4,000 件個人珍藏中精選約 300 件夢幻逸品首度公開，涵蓋《美少女戰士》、《我係小忌廉》等五大經典 IP，由 1992 年第一隻全膠 Figure 到絕版變身器一次過曝光，童年回憶殺濃度極高。

萬聖節正日（10 月 31 日）及 11 月 1 日，「我們的玩具：週末市集」集合多個精選單位，由絕版港製玩具到全球首款量產《超時空要塞》VF-1J 遙控飛機都有。同場「試玩體驗區」更提供 Takara Tomy 勇者凱撒、超合金 DX 超時空要塞等頂級收藏品免費上手，仲有專家即場示範 Pose+ LEGIOSS ETA 合金變形——平時隔住玻璃望嘅嘢，今次真係畀你摸。

聚寶坊 B1 層仲有「爆旋陀螺街頭霸王嘉年華」，設自由對戰區及正式比賽，已接受報名。如果想同其他陀螺手一決高下嘅朋友，千祈唔好錯過！