Lady M夏日滋味 – 斑蘭千層＋全球獨家斑蘭芒果海綿蛋糕，斑蘭控今夏必試！

蛋糕控有福啦！Lady M又有新搞作，今個夏天直接將超人氣「斑蘭千層蛋糕」帶來香港，仲有港澳限定、全球獨家的「斑蘭芒果海綿蛋糕」同步登場。齋睇介紹已經流口水，斑蘭控一定要Bookmark定！

新加坡熱賣王：「斑蘭千層蛋糕」終於嚟香港！

之前新加坡一推出就日日賣斷市嘅斑蘭千層蛋糕，終於可以喺香港食到啦！Lady M用新鮮斑蘭葉榨汁，再製作出層層香滑的斑蘭咖央忌廉，完美夾在超過20層薄班戟皮之間。蛋糕上中下層仲有自家製濃郁斑蘭咖央吉士醬，層次感超豐富。頂層仲加咗晶瑩斑蘭啫喱同菲律賓椰子脆片，斑蘭香加椰香，真係食完會念念不忘！

本地限定：必食「斑蘭芒果海綿蛋糕」

講到今次最大驚喜，絕對係港澳限定嘅「斑蘭芒果海綿蛋糕」！呢個蛋糕用咗斑蘭葉汁做忌廉，夾住新鮮芒果粒同手工椰子布甸，再配上濕潤斑蘭海綿蛋糕，咬落層次感十足。外層鮮忌廉混合咗椰子冧酒同馬斯卡彭芝士，滑到不得了，頂層鋪滿香甜芒果粒同玫瑰花忌廉，賣相同味道都一樣吸引！

兩款斑蘭蛋糕將會喺6月27日起於Lady M香港同澳門分店同步開賣，每日限量供應，原個蛋糕可以網上預訂，最早7月1日提貨，斑蘭控記得搶啦！

夏天小編鐘意食啲清新又有熱帶風情嘅甜品！呢款Lady M新出的斑蘭系列就啱晒啦！今個周末快啲約埋朋友一齊去試！