東京改裝車展2026 – 精品/週邊商品篇

除了改裝車和車模吸引目光，東京改裝車展2026精品及週邊商品同樣吸引不少車迷駐足。今屆週邊商品種類相當豐富，從Tee、公仔、貼紙各類文創同生活用品應有盡有。其中，Liberty Walk繼續係焦點品牌，展位長期人頭湧湧，佢哋出既Tee同外套延續一貫潮流風格，無論男女個個人手一袋戰利品。

至於今年最有話題性既，非《頭文字D》X《PUI PUI 天竺鼠車車》官方企劃莫屬，將經典車款AE86、RX-7 FC3S、FD3S以天竺鼠車車造型重新演繹，推出餅乾、紀念Tee、鎖匙扣等限定商品，成功將賽車神話與可愛元素結合。呢個聯乘企劃相當有趣同成功，第二日去到現場貨架已經空空如也。

展會之最嚟講，Greddy今年啲商品幾抵買，基本上都有折扣，目測收銀區都多人排隊。而講到最得意嘅精品，小編のpick一定係三菱嘅吉祥物「デリ丸」，上年已經見過佢哋推出嘅「都道府縣」特色公仔，今年有福袋、會場限定吊飾等商品，現場仲有免費抽デリ丸面具嘅活動，每人可以抽一次，我哋team都算好彩中咗一個，未至於全軍覆沒。至於最多週邊商品嘅品牌，感覺依然係Toyota，從食品到服飾、生活用品幾乎全面覆蓋，選擇多。不過，HKS同Tomica今年相對平淡，Tomica主打Owners Meetings商品，少咗啲亮點。

整體感覺，今年雖然多咗品牌紛紛推出精品，但吸引力同購買意欲唔及上年咁高。不過，去得日本、入得去點都會買啲嘢，帶返啲紀念品離場。而事實上，汽車文化推廣本身就不局限於車本體，精品同週邊產品嘅延伸不但可以接觸不同年齡層，仲可以令汽車文化融入日常生活，呢個發展方向相信會係未來嘅一大趨勢。