接力北京HEC模型展！杭州模型節10月底啟用 16米室內飛行場首度起機

2026 HCFC杭州國際模型文化節將於10月30日至11月1日於杭州國際博覽中心二期舉行，並與2026年全國車輛模型（攀爬、漂移）錦標賽暨「匠心眾運」全國車輛模型文化系列賽事（杭州站）同期舉行，今年展區面積達20,000平方米。呢個秋季展覽其實係接力今年初北京站嘅熱度——2026年第24屆中國國際模型博覽會單單三日已錄得逾7萬人次入場，仲有逾千款首發產品亮相，北京嘅熱潮未散，杭州已經準備接力開跑，模型迷嘅日曆表又要預留多一個週末。

今屆最大亮點係展館室內高度達16米嘅專業飛行場地，各類飛機模型、無人機同穿越機競速表演可以喺室內全程進行，唔使睇天氣面色，呢種室內大型飛行場喺同類展覽中相當罕見。靜態展區方面全面擴容升級，集合大量熱門小比例合金車模、鐵道模型、塑膠拼裝、軍事裝備及科幻機甲作品，覆蓋收藏同展示兩大需求，主打「南體驗、秋文化」概念，展現華東地區嘅文創底蘊。

不過重點當然係一系列首發車仔、鐵道模型啦，究竟到時會有咩睇，值得期待一下。