Jimmy’s Kitchen 玩轉香港味道 港式味道變英式下午茶

講起香港小食，大家自然會諗起菠蘿包、蛋撻，或者咖喱魚蛋。但如果呢班「街坊味道」登上英式下午茶架，又會變成點呢？位於中環畢打街嘅 Jimmy’s Kitchen，今個秋季推出「NOSTALGIC HONG KONG」下午茶，將一系列香港經典味道重新演繹，從原本屬於街邊小店、茶餐廳嘅味道，同英式下午茶完美結合。熟悉味道換個造型登場，有一種既親切有陌生嘅感覺。

鑊氣菜式變精緻鹹點
成套下午茶最有趣嘅，係幾款鹹點。避風塘蝦配青瓜及黑豆蛋黃醬，保留避風塘風味，但呈現方式就由鑊氣十足嘅海鮮菜式，變成一口大小嘅下午茶點心。

菠蘿包夾火腿打破傳統
英式下午茶架上面，菠蘿包配搭嘅唔再只係牛油，而係加入伊比利亞火腿，將茶餐廳麵包同歐陸食材放埋一齊，食法未必最傳統，但就幾有特色——外來食材經過重新配搭，最後變成一種日常又熟悉嘅味道。

鹹食葡撻甜點變鹹點
葡撻配貝加爾魚子醬，另一個幾有反差嘅配搭。原本熟悉嘅葡撻，加上魚子醬嘅鹹香，甜味同鹹味一齊入口，由日常甜點變成下午茶鹹點，令呢款葡式點心換咗個截然不同嘅食法。

港式奶茶變意式甜品
甜品方面，港式奶茶提拉米蘇係其中一款較有代表性嘅組合。一邊係香港茶記文化，另一邊係意大利經典甜品。兩種原本各自有固定形象嘅食物，今次就以提拉米蘇作為載體重新碰面，令茶餐廳文化同英式下午茶之間多咗一條幾有趣嘅連繫。

熟悉味道重新認識
餐廳由歐陸菜式出發，將港式味道放上下午茶架，與其話係單純追求新奇，不如話係將餐廳自身嘅歐陸傳統，同香港人熟悉嘅日常味道放埋一齊，睇下兩種文化碰撞之後，會出現咩新配搭。由味道配搭到呈現方式，都睇得出餐廳花咗唔少心思。對鍾意嘗試新事物，又鍾情於港式味道嘅食客嚟講，呢套下午茶值得親自試下。