去電子展訂1/64車仔場景？ Muse Origin

啱啱去完環球資源二期香港展，原本以為都係 AI 同機械人嘅天下，點知行行吓見到 1/64 車仔場景，對眼即刻 Bing 一聲飄咗過去——原來呢度可以訂製心水場景，幫你架車仔由「唔靚」影到「靚」。

Muse Origin 係邊間？

呢間來自上海嘅 Muse Origin 主力針對 Kidult 市場，產品目錄上列明有生產 1/18 至 1/64 合金模型，不過今次現場就唔多覺眼，主力展出嘅反而係帶燈展示場景。

現場展出幾款 1/64 連燈標準場景，由 RMB 200 起跳。放車位置除咗常見嘅室內車位連轉盤之外，仲有神殿 Style、陳列室等唔同風格。儘管我對當中部份神神怪怪嘅雕塑裝飾無乜興趣，但場景整體造工幾有睇頭。最吸引嘅係佢哋支援自訂款式——現場工作人員講得好直接：「你俾張相，我哋都可以幫你印。」對於想打造專屬展示空間嘅車仔玩家嚟講，呢個自由度幾高。

另一邊仲有常見嘅鎖匙掛勾設計，新就唔算新，但勝在同樣有得 Customise，想訂自己嘅圖案、Logo 都得。如果你做緊車仔相關嘅小生意，訂啲返去做贈品或者周邊商品都係一個選擇。估唔到 1/64 場景已經殺入電子展嘅場，某程度上反映 Kidult 市場嘅需求已經大到連 B2B 採購平台都要畀位佢。當連環球資源呢類以大貨為主嘅展會都出現車仔場景展商，未來會唔會有更多針對模型玩家嘅新玩法？